ᠪᠢᠽᠢᠨᠧᠰ ᠡᠷᢈᠢᠯᠡᢉᠴᠢᠳ᠂ ᠠᠵᠤ ᠠᠬᠤᠢ ᠶ᠋ᠢᠨ ᠨᠢᢉᠡᠴᠡ ᠨᠦ᠋ᢉᠦᠳ ᠲᠦ ᠵᠣᠷᠢᠭᠤᠯᠤᠭᠰᠠᠨ ᠲᠥᠷᠦ ᠶ᠋ᠢᠨ ᠦᠶᠢᠯᠡᠴᠢᠯᠡᢉᠡᠨ ᠦ᠋ ᠨᠢᢉᠡᠳᠦᢉᠰᠡᠨ “E-Business” ᠰᠢᠰᠲ᠋ᠧᠮ ᠰᠢᠨᠡ ᠱᠠᠲᠤᠨ ᠳ᠋ᠤ ᠭᠠᠷᠴᠤ᠂ ᠮᠣᠪᠠᠶᠢᠯ ᠬᠤᠪᠢᠯᠪᠤᠷᠢ ᠪᠠᠨ ᠡᠨᠡ ᠣᠨ ᠤ᠋ 01 ᠳ᠋ᠦ᠋ᢉᠡᠷ ᠰᠠᠷᠠ ᠶ᠋ᠢᠨ 30᠆ᠤ᠋ ᠡᠳᠦᠷ ᠠᠯᠪᠠᠨ ᠶᠣᠰᠤᠭᠠᠷ ᠨᠡᢉᠡᢉᠡᢈᠦ ᠪᠡᠷ ᠪᠡᠯᠡᠳᢈᠡᠵᠦ ᠪᠠᠶᠢᠨᠠ᠃
ᠡᠮᠦᠨᠡ ᠨᠢ ᠵᠥᠪᢈᠡᠨ ᠸᠧᠪ ᠫᠣᠷᠲ᠋ᠠᠯ ᢈᠡᠯᠪᠡᠷᠢ ᠪᠡᠷ ᠠᠵᠢᠯᠯᠠᠵᠤ ᠪᠠᠶᠢᠭᠰᠠᠨ ᠤᠭ ᠰᠢᠰᠲ᠋ᠧᠮ ᠡᠶᠢᠨ ᢈᠦ ᠮᠣᠪᠠᠶᠢᠯ ᠠᠫᠫᠯᠢᠻᠧᠶᠢᠱᠢᠨ᠋ ᠲᠡᠢ ᠪᠣᠯᠵᠤ ᠰᠢᠨᠡᠴᠢᠯᠡᢉᠳᠡᢉᠰᠡᠨ ᠢ᠋ᠶᠡᠷ ᠲᠥᠷᠦ ᠶ᠋ᠢᠨ ᠦᠶᠢᠯᠡᠴᠢᠯᠡᢉᠡᠨ ᠦ᠋ ᢈᠦᠷᠲᠡᢉᠡᠮᠵᠢ᠂ ᠢᠯᠡ ᠲᠣᠳᠤ᠂ ᠰᠢᠭᠤᠷᠬᠠᠢ ᠪᠠᠶᠢᠳᠠᠯ ᠢ᠋ ᠨᠡᠮᠡᢉᠳᠡᢉᠦᠯᢈᠦ ᠴᠢᠬᠤᠯᠠ ᠰᠢᠨᠡᠴᠢᠯᠡᠯ ᠶᠤᠮ᠃
“E-Business” ᠫᠯᠠᠲ᠋ᠹᠣᠷᠮ ᠨᠢ ᠪᠢᠽᠢᠨᠧᠰ ᠡᠷᢈᠢᠯᠡᢉᠴᠢᠳ ᠲᠦ ᠵᠣᠷᠢᠭᠤᠯᠤᠭᠰᠠᠨ ᠲᠥᠷᠦ ᠶ᠋ᠢᠨ ᠪᠦᢈᠦ ᠦᠶᠢᠯᠡᠴᠢᠯᠡᢉᠡ ᠶ᠋ᠢ ᠨᠢᢉᠡ ᠴᠡᢉ ᠡᠴᠡ ᠠᠪᠬᠤ ᠪᠣᠯᠤᠮᠵᠢ ᠶ᠋ᠢ ᠪᠦᠷᠢᠳᠦᢉᠦᠯᠳᠡᢉ᠃ᠬᠠᠷᠢᠨ ᠮᠣᠪᠠᠶᠢᠯ ᠬᠤᠪᠢᠯᠪᠤᠷᠢ ᠨᠡᠪᠲᠡᠷᠡᢉᠰᠡᠨ ᠢ᠋ᠶᠡᠷ ᠳᠠᠷᠠᠭᠠᢈᠢ ᠰᠢᠨᠡ ᠳᠠᠪᠠᠭᠤ ᠲᠠᠯᠠ ᠨᠤᠭᠤᠳ ᠪᠤᠢ ᠪᠣᠯᠵᠤ ᠪᠠᠶᠢᠨᠠ᠃ᠡᢉᠦᠨ ᠳ᠋ᠦ:
- ᠲᠥᠷᠦ ᠶ᠋ᠢᠨ ᠦᠶᠢᠯᠡᠴᠢᠯᠡᢉᠡ ᠶ᠋ᠢ ᠬᠠᠮᠢᠭᠠ ᠠ᠋ᠴᠠ ᠴᠤ᠂ ᢈᠡᠵᠢᠶᠡ ᠴᠦ ᠭᠠᠷ ᠤᠲᠠᠰᠤ ᠪᠠᠷ ᠢ᠋ᠶᠠᠨ ᠠᠪᠬᠤ
- ᠦᠶᠢᠯᠡᠴᠢᠯᠡᢉᠡᠨ ᠦ᠋ ᠶᠠᠪᠤᠴᠠ᠂ ᠲᠥᠯᠦᠪᠦᠷᠢ ᠲᠣᠭᠠᠴᠠᠭᠠ᠂ ᠮᠡᠳᠡᢉᠳᠡᠯ ᠢ᠋ ᠪᠣᠳᠠᠲᠤ ᠴᠠᠭ ᠤ᠋ᠨ ᠭᠣᠷᠢᠮ ᠢ᠋ᠶᠠᠷ ᢈᠢᠨᠠᠬᠤ
- ᠰᠢᠰᠲ᠋ᠧᠮ ᠡᠴᠡ ᠣᠯᠭᠤᠭᠰᠠᠨ ᠯᠠᠪᠯᠠᠭᠠ᠂ ᠲᠣᠳᠤᠷᠬᠠᠶᠢᠯᠠᠯᠲᠠ ᠶ᠋ᠢ QR ᠻᠣᠳ᠋ ᠢ᠋ᠶᠠᠷ ᠪᠠᠲᠤᠯᠠᠭᠠᠵᠢᠭᠤᠯᠬᠤ
- ᠬᠠᠤᠯᠢ ᠶ᠋ᠢᠨ ᠡᠲᠡᢉᠡᠳ ᠦ᠋ᠨ ᠴᠠᢈᠢᠮ ᢉᠡᠷᠡᠴᠢᠯᠡᢉᠡ᠂ ᠳᠦᠷᠢᠮ ᠦ᠋ᠨ ᠬᠠᠭᠤᠯᠪᠤᠷᠢ ᠶ᠋ᠢ ᠰᠢᠭᠤᠳ ᠲᠠᠲᠠᠨ ᠠᠪᠬᠤ
ᠡᠳᠡᢉᠡᠷ ᠪᠣᠯᠤᠮᠵᠢ ᠨᠢ ᠪᠢᠽᠢᠨᠧᠰ ᠡᢈᠢᠯᠡᢉᠦᠯᢈᠦ ᠪᠣᠯᠤᠨ ᠦᠶᠢᠯᠡ ᠠᠵᠢᠯᠯᠠᠭᠠ ᠶᠠᠪᠤᠭᠤᠯᠬᠤ ᠳ᠋ᠤ ᠵᠠᠷᠤᠴᠠᠭᠤᠯᠳᠠᠭ ᠴᠠᠭ ᠬᠤᠭᠤᠴᠠᠭᠠ᠂ ᠵᠠᠷᠤᠳᠠᠯ ᠢ᠋ ᠪᠣᠳᠠᠲᠤ ᠪᠠᠷ ᠪᠠᠭᠤᠷᠠᠭᠤᠯᠬᠤ ᠴᠢᠬᠤᠯᠠ ᠠᠯᠬᠤᠮ ᠪᠣᠯᠵᠤ ᠪᠠᠶᠢᠨᠠ᠃E-Business ᠫᠯᠠᠲ᠋ᠹᠣᠷᠮ ᠨᠡᢉᠡᢉᠡᢉᠳᠡᢉᠰᠡᠨ ᠡᠴᠡ ᠬᠣᠶᠢᠰᠢ ᠥᠨᠦᠳᠦᠷ ᠦ᠋ᠨ ᠪᠠᠶᠢᠳᠠᠯ ᠢ᠋ᠶᠠᠷ 186᠂000 ᠣᠷᠴᠢᠮ ᢈᠡᠷᠡᢉᠯᠡᢉᠴᠢ ᠰᠢᠰᠲ᠋ᠧᠮ ᠢ᠋ ᠡᠳᠦᠷ ᠲᠤᠲᠤᠮ ᠤ᠋ᠨ ᠦᠶᠢᠯᠡ ᠠᠵᠢᠯᠯᠠᠭᠠᠨ ᠳ᠋ᠤ ᠪᠠᠨ ᠠᠰᠢᠭᠯᠠᠵᠤ ᠪᠠᠶᠢᠭᠠ ᠨᠢ ᠲᠤᠰ ᠰᠢᠰᠲ᠋ᠧᠮ ᠦ᠋ᠨ ᢈᠡᠷᠡᢉᠴᠡᢉᠡ᠂ ᠦᠷᠡ ᠥᢉᢉᠦᢉᠡᠵᠢ ᠶ᠋ᠢ ᠪᠣᠳᠠᠲᠤ ᠪᠠᠷ ᠬᠠᠷᠠᠭᠤᠯᠵᠤ ᠪᠠᠶᠢᠨᠠ᠃
ᠲᠡᢉᠦᠨᠴᠢᠯᠡᠨ E-Business ᠰᠢᠰᠲ᠋ᠧᠮ ᠨᠢ ᠠᠵᠤ ᠠᠬᠤᠢ ᠶ᠋ᠢᠨ ᠨᠢᢉᠡᠴᠡ ᠰᠢᠨᠡ ᠪᠡᠷ ᠪᠠᠶᠢᠭᠤᠯᠬᠤ ᠦᠶᠢᠯᠡ ᠶᠠᠪᠤᠴᠠ ᠶ᠋ᠢ ᢈᠢᠯᠪᠠᠷᠰᠢᠭᠤᠯᠬᠤ᠂ᠲᠥᠷᠦ ᠪᠢᠽᠢᠨᠧᠰ ᠦ᠋ᠨ ᠬᠠᠷᠢᠯᠴᠠᠭᠠ ᠶ᠋ᠢ ᠴᠠᢈᠢᠮᠵᠢᠭᠤᠯᠬᠤ᠂ ᠢᠯᠡ ᠲᠣᠳᠤ ᠪᠠᠶᠢᠳᠠᠯ ᠢ᠋ ᠨᠡᠮᠡᢉᠳᠡᢉᠦᠯᢈᠦ ᠵᠠᠮ ᠢ᠋ᠶᠠᠷ ᠠᠯᠪᠠᠨ ᠪᠤᠰᠤ ᠡᠳ᠋ ᠦ᠋ᠨ ᠵᠠᠰᠠᠭ ᠢ᠋ ᠬᠤᠮᠢᠬᠤ᠂ ᠲᠠᠲᠠᠪᠤᠷᠢ ᠶ᠋ᠢᠨ ᠪᠠᠭᠠᠵᠠ ᠰᠠᠭᠤᠷᠢ ᠶ᠋ᠢ ᠥᠷᢉᠡᠵᠢᢉᠦᠯᢈᠦ ᠪᠣᠳᠤᠯᠭᠠ ᠶ᠋ᠢᠨ ᠠᠴᠢ ᠬᠣᠯᠪᠤᠭᠳᠠᠯᠲᠠᠢ ᠶᠤᠮ᠃
ᠪᠢᠽᠢᠨᠧᠰ ᠡᠷᢈᠢᠯᠡᢉᠴᠢᠳ ᠥᠪᠡᠷ ᠦ᠋ᠨ ᠻᠣᠮᠫᠠᠨᠢ ᠲᠠᠢ ᠬᠣᠯᠪᠤᠭᠠᠲᠠᠢ ᠲᠥᠷᠦ ᠳ᠋ᠦ ᠪᠦᠷᠢᠳᢈᠡᠯᠲᠡᠢ ᠮᠡᠳᠡᢉᠡᠯᠡᠯ᠂ᠵᠥᠪᠰᠢᠶᠡᠷᠡᠯ᠂ ᠯᠠᠪᠯᠠᠭᠠ ᠶ᠋ᠢ ᠨᠢᢉᠡ ᠰᠢᠰᠲ᠋ᠧᠮ ᠡᠴᠡ ᠰᠢᠭᠤᠷᠬᠠᠢ ᠠᠪᠬᠤ ᠪᠣᠯᠤᠮᠵᠢ ᠪᠦᠷᠢᠳᠴᠦ ᠪᠠᠶᠢᠭᠠ ᠨᠢ ᠵᠢᠵᠢᢉ᠂ ᠳᠤᠮᠳᠠ ᠪᠢᠽᠢᠨᠧᠰ ᠢ᠋ ᠪᠣᠳᠠᠲᠤ ᠪᠠᠷ ᠳᠡᠮᠵᠢᢉᠰᠡᠨ ᠴᠢᠬᠤᠯᠠ ᠰᠢᠨᠡᠴᠢᠯᠡᠯ ᠪᠣᠯᠵᠤ ᠪᠠᠶᠢᠨᠠ᠃ᠡᠨᠡ ᠨᠢ ᠲᠥᠷᠦ ᠶ᠋ᠢᠨ ᠦᠶᠢᠯᠡᠴᠢᠯᠡᢉᠡ ᠶ᠋ᠢ ᠢᠷᢉᠡᠨ ᠳ᠋ᠦ ᠣᠶᠢᠷᠠᠳᠤᠭᠤᠯᠵᠤ᠂ ᠪᠢᠽᠢᠨᠧᠰ ᠡᠷᢈᠢᠯᠡᢉᠴᠢᠳ ᠲᠦ ᠡᢉᠡᠯᠢᠲᠡᠢ᠂ ᢈᠢᠯᠪᠠᠷ᠂ ᠢᠯᠡ ᠲᠣᠳᠤ ᠡᠻᠣᠰᠢᠰᠲ᠋ᠧᠮ ᠪᠦᠷᠢᠯᠳᠦᢈᠦ ᠳ᠋ᠦ ᠴᠢᠬᠤᠯᠠ ᠲᠦᠯᢈᠢᠴᠡ ᠪᠣᠯᠤᠨᠠ ᢉᠡᠵᠦ ᠰᠠᠯᠪᠤᠷᠢ ᠶ᠋ᠢᠨ ᢈᠢᠨ ᠦᠵᠡᠵᠦ ᠪᠠᠶᠢᠨᠠ᠃